Ol Tacolér (Vernacolo delle valli)

Ol Tacolér Pastore della
Val Brembana

Só dè Altès ! ü ché trabasca,
soi d'la rassa bergamasca,
'n dè la Morla batezàt
con ghidàs, zérmà, e Cüràt.
Sì mé nom'na "polèntù" !
sempèr mèi dè "lazzarù" !
Só gnìt grand con't i stràchì,
coi cüstiöle e codèghì,
formàgièle, làcc nostrà,
la polènta...al pòst dèl pà.
Se fénìt gó le polènte,
po' a dì cröste mé contènte.
Dè mestèr mè fó 'l cavrér,
'n fì 'lla féra l'è ü mestér,
ai bordèi dè la sità,
preferesse i pràcc dè cà.
Con innante "batidùra"
i otre cavre i và a bonùra.
I mè cavre i màia verdusa
se 'l padrù del càp al vusa,
sbalze 'n 'dré pèr ol sentér
só negót ! só ü tacolér.
I mé cavre i mé vé dré,
mé déànte...e lur dè dré.
Ol toscà l'è ü mé caprésse,
mè che 's gabbia qualche vesse,
se mé to-sé, o gó 'l catàr,
me sé quarce col tabàr.
'N dè mé bàita sé fà frècc,
con la monéga vò i lècc.
Pì 'ndà in Berghèm l'è normal,
fói pò miga la statal,
per i bréch mé passe zò,
soi pò miga tàt coiò !.
Le mé stade i è i sèntér,
s'arèss miga ü bù cavrér.
'Ndè la guèra ó fàcc l'Alpì,
sö pì mucc, vizì ai confì,
mé, coi müi, staé prope bé,
mé polènta,...e lùr ol fé.
Quando ghè fernìt la guèra,
so turnàt sper mé a mé tèra.
Adès Berghèm l'è cambiàt,
'n mèss i mucc, mé só scapàt,
se mé sténche...vardì fiöi,
sotrém sóta.... 'n quàlch seriöi,
e dizzem per mé memoria,
quater Patèr, Ave, Gloria.
*...*
Dominoni Pietro (da Valtesse BG.)'2003'