Cèco 'l dés: prim dè fà 'l mas,
varda con chi go dè stà,
ma desmèt dè fà 'l paias,
gà respunt Gì, dè Casà.

Noter, giöghèm töcc i dé,
'l dés al Griso al sò visì,
'ntat, Tugnèta, porta ché,
na gasusa, e trì quartì.

Mès-cia i carte, tèa 'ndu 'l mas,
segna i ràc sö la tabèla,
'ntàt che Gì, 'l frèga zo 'l nas,
Nèto 'l màia na caremèla.

Tàca Cèco, Gì, stà quèt,
'l dés al Griso col vu-sà,
sa pöl mia parlà, desmèt,
té gnamò dè 'ncumincià.

Cèco, 'l Griso, Nèto, e Gì,
i sà 'nvia a fà 'l brisculì,
giöga 'l carèch, ghè fò 'l trì,
'ntàt i baga i sò quartì.

     *...*

(Autore DOMINONI Pietro '1969')